துரியோதனன் நம்பிக்கை

(பாரதப் போரில் அர்ச்சுணனும் கண்ணனும் ஒன்றாகச் சேர்ந்து வரும் காட்சியைக் கண்டு துரியோதனன் சொல்வது)

சேனை பதினாறு நம் வசங்கொண்டு

    சேர்ந்த பகை ஐந்தை வெல்லுவோம் - பல

யானை பலங்கொண்ட பீஷ்மர் வசமுண்டு

    யாரும் வெற்றியே கொள்ளுவோம் !

துரோணர் இங்குண்டு கர்ணன் இங்குண்டு

    துக்‌ஷலைக் கேள்வன் உண்டுபார் - அட

வீரன் நானுண்டு தம்பி நூறுண்டு

    விந்தை மாமனும் உண்டுபார் !

ஐந்தின் முன்னூறு தோற்குமோ? பாறை

    ஆற்றின் விசைதன்னை பேர்க்குமோ ? - உடல்

நைந்து வீழ்வதுவும் உறுதி காண்! ஐவர்

    நாசம் காணுவதும் நிச்சயம் !

சோறு கண்டொருவன் பொங்குவான்! ஒருவன்

    சொன்ன தருமவழி கொல்லுவான் - மலர்

நாறு குழலணங்கில் வீழுவான், அந்த

    நல்ல குணமற்ற அர்ச்சுணன் !

மேலும் இருவர்! அவர் தும்பிகள் ! சின்ன

     மேடு கண்டஞ்சும் தம்பிகள் - அட

காலன் வேலைமிக எளிது தான்! இவரைக்

     கையில் அள்ளியவன் ஏகுவான் !

கூந்தல் முடியாத பெண்ணின் வெஞ்சினமும்

    கூற்றை ஒத்ததெனச் சொல்லுவார் - அட

ஏந்தும் வீரமது கொண்டு நானந்த

    எமனின் சேனையையும் வெல்லுவேன் !

மோனை யற்றதொரு மொக்கைக் கவிதையென

    மோகக் கண்ணனும் நிற்கிறான் - அவன்

சேனை, அண்ணன்துணை யாவும் நமதுவசம் !

    செல்லுமோ அவனின் ஆட்டமே !

நாடு நம்முடைமை நாசம் அவருடைமை

    நல்ல புகழும் இனி நம்மிடம் - பெரும்

பீடு கொண்ட உயர் அத்தினாபுரமும்,

    பின் இந்த்ராபுரியும் நமது காண் !

மாமன் சூதுண்டு மன்னும் சேனைகள்

    மாபெருங் கரிகள் உண்டடா ! - அட

நாமும் வென்றுவிட நாட்கள் அதிகமிலை

    நல்ல தேரை நடத்தடா !

சின்ன பாலகரைக் களம் இறக்கிவிடும்

    சிறுமை அவரிடத்தில் காணடா - தம்பி

என்ன தயக்கம் ? இனி ஏற்று நாண் ! இவரை

    எட்டு நொடியில் மண்ணாக்கலாம்

-விவேக்பாரதி

12.05.2017